Illustration -Napoléon à MontaubanLO BICENTENARI ES ACABAT !

Napoleon à Montalban

En aquela annada commemorativa de la creacion del Tarn e Garona, l’Académia de Montalban ven de portar un agach novèl sul poèma Napoleon a Montalban, que balha totes los detalhs sus la jornada del 29 de julhet de 1808. Edoard Forestièr l’aviá fach pareisser dins lo Butletin de la Societat arqueologica en 1908 : èra una compilacion de las doas còpias conegudas (degun sap ont es passat l’original). Aqueste còp, la grafia n’es estada normalisada per Estève Bordoncle e Norbèrt Sabatièr a balhat una revirada en vèrses, aprèp una pichona presentacion critica.
En mai del poèma occitan de Constans-Manàs, ambe la revirada francesa, d’imatges inedits son publicats dins aqueste libròt de 66 paginas, a començar per las armas de la bona vila de Montalban, de las tres abelhas en plaça de las tres flors de liri. I a tanben una gravadura del fons Forestièr que representa l’emperaire a caval, saludat par un fòc d’artifici*.

*On se pòt crompar lo libròt a L’Ostalet, carrièra del Collègi, a Montalban, al prètz de 10 euros, o pel biais del siti : academie-montauban.fr ont se pòdon trapar fòrça causas en rapòrt ambe la lenga nòstra.